Një pjesë e mediave maqedonase po i kontribojnë tensionimit të situatës duke transmetuar programe të studiove të hapura me qytetarët.

Këto programe kryesisht po i emitojnë televizionet e afërta me pushtetin dhe partinë VMRO-DPMNE, ndër të cilët janë edhe televizioni “Sitel” me një emision të njohur “Bumbar”, por edhe Kanal 5 në programin e mëngjesit të së martës, ku qytetarëve i`u mundësohej drejtpërdrejt të shprehin qëndrimet e tyre lidhur me protestat e organizuara, publikimin e enciklopedisë dhe situatës aktuale. 

Në këto programe janë shfaqur ofendime dhe akuza të rënda ndaj shqiptarëve, duke kërkuar që “ata të goditen nga shteti”, “të shkojnë në Shqipëri të kërkojnë të drejta më shumë”, “nuk kanë hise në Maqedoni”, “të mbrohet e vërteta e enciklopedisë maqedonase” dhe teza të tjera ofenduese, etj.  

Lidhur me këto programe ka reaguar në mënyrë të heshtur Këshilli për Radiodifuzion, duke i apeluar televizioneve në vend që të jenë të kujdesshme me emitimin e programeve të tilla, që mund të përkeqësojnë raportet ndëretnike dhe përmbajnë fjalor të urrejtjes dhe ofendimeve në baza etnike. (INA)